A A.VV. As Marías comeza un ciclo de actividades que agardamos sexan de moito interese para toda a veciñanza. Dende logo, este obradoiro de comida vexetariana superou todas as nosas expectativas de público e a cociña do C.S. O Pichel (a quen agradecemos sempre a súa colaboración e predisposición a colaborar coa nosa Asociación) era un ir e vir de homes e mulleres preocupados pola súa alimentación e con moitas, moitas ganas de aprender. A nosa mestra de cerimonias foi Adriana, unha veciña convencida coa opción vexetariana e foi quen de demostrarnos que na nosa cociña ademais de carne ou peixe hai moitas e ben saborosas posibilidades.
O vindeiro obradoiro que faremos, ou así o temos pensado, será o de “costura de primeiros auxilios” ou como subir un fondo de pantalón, amañar unha cremalleira ou estreitar unha prenda. Agardamos que vos guste.
